Ramiz Mehdiyev kimdir?
23
oktyabr 2019-cu ildə fəlsəfə elmləri doktoru, akademik Ramiz Mehdiyev Azərbaycan
Milli Elmlər Akademiyasının prezidenti vəzifəsinə seçilib. Qeyd edim ki, akademiyanın
tarixində ilk dəfədir ki, prezident humanitar-ictimai elmlər sahəsindən
seçilir. Bəs yeni AMEA prezidenti Ramiz Mehdiyevin kim olduğunu bilirsinizmi?
Ramiz
Ənvər oğlu Mehdiyev 17 aprel 1938-ci ildə Bakı şəhərində anadan olub.
1957-ci
ildə Bakı Dənizçilik Məktəbini bitirdikdən sonra həmin ilin may ayından 1962-ci
ilin avqustuna qədər “Xəzərdənizneftqazsənaye” Ümumittifaq İstehsalat
Birliyinin “Xəzərneftdonanma” İdarəsində işləyib.
Ali təhsilini
Azərbaycan Dövlət Universitetinin Tarix fakültəsində alıb.
1965-ci
ilin dekabrından 1967-ci ilin dekabrına qədər Azərbaycan SSR Lenin Komsomolu Gənclər
İttifaqının Mərkəzi Komitəsində təlimatçı, növbəti 1 il həmin ittifaqın
Naxçıvan Vilayət Komitəsində ikinci katib, 1968-ci ilin dekabrından 1971-ci
ilin dekabrınadək Moskva Dövlət Universitetinin fəlsəfə fakültəsində aspirant
olub. 1972-ci ilin mayında Moskva Dövlət Universitetinin Müdafiə Şurasının
iclasında fəlsəfə elmləri namizədi alimlik dərəcəsini almaq üçün
dissertasiyasını müdafiə edib.
1972-ci
ilin fevralından 1974-cü ilin mayına qədər Azərbaycan Dövlət Universitetinin
elmi kommunizm kafedrasının müəllimi, daha sonra isə baş müəllimi vəzifələrində
çalışıb.
1974-cü
ilin mayından 1978-ci ilin
oktyabrınadək Azərbaycan KP MK-da əvvəlcə mühazirəçi, daha sonra isə şöbə
müdirinin müavini vəzifələrində, 1978-ci ilin oktyabrından 1980-ci ilin
iyulunadək 26 Bakı Komissarı Rayon Partiya Komitəsinin birinci katibi vəzifəsində
fəaliyyət göstərib.
1980-ci
ilin iyulundan 1983-cü ilin dekabr ayına kimi Azərbaycan KP MK-də şöbə müdiri
olub. Daha sonra isə 1988-ci ilin mayınadək Azərbaycan KP MK-nin katibi vəzifəsində
işləyib.
1
iyun 1988-ci ildən 4 fevral 1994-cü ilədək Azərbaycan Elmlər Akademiyasının
İctimai-Siyasi Tədqiqatlar və İnformasiya İnstitutunun şöbə müdiri idi. 1993-cü
ildə fəlsəfə elmləri doktoru alimlik dərəcəsi almaq üçün dissertasiya müdafiə
edib.
1980-1990-cı
illərdə iki çağırış Azərbaycan SSR Ali Sovetinin deputatı, 1995-ci ildə isə Azərbaycan
Milli Məclisinin deputatı seçilib. O, Azərbaycan Respublikası Milli Məclisinin
I çağırış deputatı olduğu dövrdə Azərbaycan—Avstriya parlamentlərarası əlaqələr
üzrə işçi qrupunun rəhbəri olub.
4
fevral 1994-cü ildən Azərbaycan Respublikası Prezidentinin İcra Aparatının
ümumi şöbəsinin müdiri olan Ramiz Mehdiyev, 7 fevral 1995-ci ildə Azərbaycan
Respublikası Prezidentinin İcra Aparatının rəhbəri vəzifəsinə təyin edilib. Həmin
vəzifə 2009-cu ildə Azərbaycan Respublikası Konstitusiyasına edilmiş dəyişikliklərlə
əlaqədar qəbul olunmuş Referendum Aktından sonra Azərbaycan Respublikası
Prezidentinin Administrasiyasının rəhbəri adlanıb.
O, 2001-ci
ildə Nyu-York Elmlər Akademiyasının üzvü, 2007-ci ilin aprelində isə Azərbaycan
Milli Elmlər Akademiyasının həqiqi üzvü seçilib.
Azərbaycan
Fəlsəfə və Sosial-Siyasi Elmlər Assosiasiyasının rəhbəri olan Ramiz Mehdiyev 26
kitabın, 250-dən çox məqalənin müəllifidir. Əsas elmi nailiyyətləri ölkənin
modernləşmə və dayanıqlı inkişafının fəlsəfi konsepsiyasını işləməsi və dövlət
ideologiyasının elmi-fəlsəfi əsaslarını hazırlamasıdır.
10
avqust 2004-cü ildən Həqiqi dövlət müşaviri olan Ramiz Mehdiyev Azərbaycan
Respublikasında dövlət qulluğunda səmərəli fəaliyyətinə və dövlət quruculuğu
işlərində xüsusi xidmətlərinə görə 17 aprel 2008-ci ildə "İstiqlal"
ordeni ilə, 21 sentyabr 2011-ci ildə Polşa Milli Təhlükəsizlik Bürosunun xatirə
medalı ilə, Azərbaycan Respublikasında dövlət quruculuğu sahəsində xüsusi xidmətləri
və dövlət qulluğunda səmərəli fəaliyyətinə görə 17 aprel 2013-cü ildə “Şərəf”
ordeni ilə, Azərbaycan Respublikasında dövlətçiliyin möhkəmləndirilməsində səmərəli
fəaliyyətinə və elmin inkişafında böyük xidmətlərinə görə 16 aprel 2018-ci ildə
“Şöhrət” ordeni ilə, 23 oktyabr 2019-cu ildə isə Azərbaycan Respublikasında
dövlət idarəçiliyi və elmin inkişafı sahəsində səmərəli və uzunmüddətli xüsusi
xidmətlərinə görə “Heydər Əliyev” ordeni ilə təltif edilib.
Ramiz
Mehdiyev 23 oktyabr 2019-cu ildə Azərbaycan Respublikası Prezidentinin
Administrasiyasının rəhbəri vəzifəsindən azad edilib və Azərbaycan
Respublikasının Təhlükəsizlik Şurasının tərkibinə daxil edilib. Elə həmin gün
Azərbaycan Milli Elmlər Akademiyasının ümumi yığıncağında Azərbaycan Milli Elmlər
Akademiyasının prezidenti seçilib və Azərbaycan Respublikasının Prezidenti
İlham Əliyev tərəfindən həmin vəzifəyə təsdiq edilib.
Musiqi: Midnight Prophet NEW 2:23 Sarah, The Illstrumentalist Hip Hop ve Rap | Karanlık
