Qubada 20-dən çox ev təhlükədədir

Qubanın Qrız Dəhnə kəndi ərazisində torpaq sürüşməsi qeydə alınıb.

APA TV-nin şimal bürosunun verdiyi məlumata görə, 50 hektar ərazini əhatə edən sürüşmə zonası dağlıq ərazidə yerləşir. Sürüşmə zonasının əhatəsi genişlənir və kəndə doğru yaxınlaşır. Ümumilikdə 25 ev təhlükəli ərazidə yerləşir.

Quba rayon icra hakimiyyətindən APA TV-yə verilən məlumata görə, hadisə yerinə Quba rayon icra hakimiyyəti başçısı Ziyəddin Əliyev və Fövqəladə Hallar Nazirliyi əməkdaşları baxış keçirib. Sürüşmənin aktivliyi nəzərə alınaraq sürüşmə zonasına yaxın ərazidə yerləşən ailələr evlərindən köçürülüb.

Ərazidə müvafiq qurumların əməkdaşları tərəfindən növbətçilik təşkil olunub. Sürüşmənin aktivliyi nəzərə alınaraq müvafiq qərar qəbul olunacaq.