Dünən saat 22:18 radələrində dörd gənc ayaqlarına təkərlik (rolik) geyinərək Bakının mərkəzi küçələrində əməlli-başlı şou göstəriblər. Avtosfer.az-ın əməkdaşları onların bu halına şahid olub. Həmin gənclər Parlament prospekti ilə Mikayıl Müşfiq küçəsinin kəsişməsində üzü Nərimanov heykəlinə tərəf yüksək sürətlə yolun hərəkət hissəsində təhlükəli manevrlər ediblər. Onların üçündə qulaqlıq və əllərində telefonla məşğul olduqları halda təxminən saatda 50-60 km sürətlə maşınların arasında hərəkət ediblər. Nərimanov heykəlinin yanından sağa, Teymur Elçin küçəsi istiqamətində hərəkət edən gənclər burada da nəqliyyat vasitələrinə təhlükə yaradaraq Lermontov küçəsinə daxil olublar. Ardınca Nazirlər Kabinetinin yanı ilə Şeyx Şamil küçəsinə çıxıblar. Oradan isə üzü Prezident Adminstrasiyası istiqamətində hərəkət edərək Niyazi küçəsi ilə Azneft dairəsinə doğru gediblər. Bu zaman yenə də yolun hərəkət hissəsi və avtomobillərin arası ilə rolik sürüblər. Bununla həm özlərini, həm də digər hər hərəkət iştirakçılarına təhlükə yaradıblar.
Azneft meydanında isə onları 99 YP 415 dövlət nömrə nişanlı patrul avtomobildə xidmət aparan əməkdaşlar onları saxlayıb.
Bulvar ərazisinə daxil olan gənclərdən üçü saxlanılıb. Aparılan söhbətlər zamanı gənclərin 17-21 yaşlarında olduğu müəyyən edilib. Hətta birinin xaricdə təhsil aldığı məlum olub. Onlara pozduqları qaydalar izah olunub, bunun təhlükəli tərəflərini bildirilib. Lakin gənclər bununla razılaşmayıb və Bakıda rolik sürmək üçün yer olmadığını deyərək məsuliyyətdən yayınmağa çalışıblar. Amma YPX əməkdaşları həmin şəxslər barəsində inzibati qaydada protokol tərtib edib və gənclər cərimələnib. Avtosfer.az görüntülərin bir hissəsini təqdim edir:
