Neftçalada Nərə Balıqartırma zavodu inşa edilir

  • 04.06.2020
  • 397 baxış
  • 0

Neftçala Kür Təcrübə Nərə Balıqartırma zavodunun bir hissəsi yenidən qurulmaqla ərazidə böyük infrastruktura malik nərə balıqartırma zavodu inşa edilir. APA TV-nin Mil-Muğan bürosunun məlumatına görə, yenidənqurma və tikinti işləri son 20 ildə fəaliyyətsiz qalan Kür Təcrübə Nərə Balıqartırma zavodunun bazasında aparılır. 64 il əvvəl, Neftçala rayonunun Yenikənd kəndində salınan zavod hazırda ən müasir texnoloji avadanlıqlar tətbiq edilməklə tikilir. Ərazidə inzibati və yardımçı tikililərin inşası yekunlaşmaq üzrədir. İstehsal sahələrində, o cümlədən qapalı su çevirmə sistemində isə hazırda avadanlıqlar quraşdırılır. 21 tikilidən ibarət olan və 70 hektar ərazini əhatə edən zavodun ərazisində açıq havada 35 nohur yaradılıb. Müasir tələblərə uyğun qurulan Kür Təcrübə Nərə Balıqartırma müəssisəsində nərə cinsli balıqların kürüsündən körpə balıqlar alınacaq. Filtirasiya olunmuş suda yetişdirilən balıqların bir hissəsi ekoloji layihə olaraq Kür çayı və Xəzər dənizinə buraxılacaq. Məqsəd sözügedən su hövzələrində nərə cinsli balıqların nəsli kəsilmə təhlükəsini aradan qaldırmaqdır. Zavodun əsas iş prinsipi su itikisi olmadan, yəni ekologiyaya zərər vermədən balıq yetişdirmək olacaq. Zavodda CITES Konvensiyası (”Kökünün kəsilməsi təhlükəsi olan vəhşi fauna və yabanı flora növlərinin beynəlxalq ticarəti”) çərçivəsində nəsli kəsilməkdə olan 4 növ edemik balığın (bölgə, kələmo, nərə və uzunburun) yetişdirilməsi planlaşdırılır. Yetişdirilən nərə cinsli balıq körpələrinin bir hissəsi böyüdülərək əmtəəlik məqsədilə istifadə ediləcək. İstehsal olunan balıq əti və kürü təbii su hövzələrindən ovlanan balıqlardan alınan məhsullardan fərqlənməyəcək. Bunun üçün rayonun Şirvanlı kənd ərazisində, Xəzər dənizinə yaxın sahədə yardımçı təsərrüfat da yaradılıb. 64 dairəvi hovuz tikilib və dəniz suyu ilə doldurulub. Zavodda ilkin mərhələdə il ərzində 100 ton əmtəəlik balıq və 10 ton kürü istehsal olunacaq. Əldə edilən məhsulun bir qismi yerli tələbatın ödənilməsinə yönəldiləcək, qalanı isə ixrac ediləcək. Yenikənddə olan nərə balıqartırma təsərrüfatında yetişən kiçik balıq körpələrinin 100 qramdan artıq böyüdüyü halda tam təbii olaraq dəniz suyu ilə qidalanan hovuzlarda yetişdirilir. Xəzər dənizində nərə cinsindən olan balıq növünün tükənməsi təhlükəsi olduğundan bu layihənin də əsas məqsədi ekoloji problemin həll olunması istiqamətində atılan addımlardan biridir. Bundan əlavə müəssisə sənaye turizmi istiqamətində də fəaliyyət göstərəcək. Belə ki, zavoddakı istehsal sahələrinin bir hissəsi olduğu kimi saxlanılacaq. Balıqçılıqla maraqlanan turistlərə, həmçinin məktəblilər və tələbələrə həm yeni, həm də əvvəlki illərdə körpə balıqların yetişdirilməsi prosesi əyani olaraq nümayiş olunacaq. Qeyd edək ki, zavodun tikintisi 2018-ci il oktyabr ayında start götürüb və yaxın müddətdə istifadəyə verilməsi gözlənilir. Zavodda Dövlət investisiya payı 51%, qalan pay isə “Azərbaycan Fish Farm” MMC-yə məxsusdur.

Nə düşünürsən?