Seçkidə qanun pozanlar həbs oluna bilər

“Seçki prosesini pozan, saxtakarlığa yol verən şəxslər cinayət məsuliyyətinə cəlb olunmalıdır. Qanun bunu tələb edir”.

BakuPost xəbər verir ki, bunu “Konstitusiya” Araşdırmalar Fondunun prezidenti Əliməmməd Nuriyev İTV-də yayınlanan "Diqqət Mərkəzi - Yekun" proqramında deyib.



Onun sözlərinə görə, baş verən pozuntuların hansı nəticələrə gətirib çıxarması müəyyən olunmalı və qanunvericiliyin tələblərinə uyğun olaraq həmin şəxslər cəzalandırılmalıdır:



“Seçki Məcəlləsində pozuntularla bağlı hansı məsuliyyətin nəzərdə tutulması öz əksini tapıb. Eyni zamanda İnzibati Xətalar Məcəlləsində bu məsələləri özündə ehtiva edən 15, Cinayət Məcəlləsində isə 4 maddə var. Hətta bu pozuntulara görə 7 il azadlıqdan məhrum etməylə bağlı cəza var. Başqasının əvəzinə topa-topa bülletenlər atan şəxsin yüksək məbləğdə cərimələnməsi, islah işlərinə cəlb edilməsi ilə bağlı qanun var”.