Narkotikə görə tutuldular, başqa əməlləri üzə çıxdı

Tovuz sakinlərində narkotik maddə aşkarlanıb.

DİN-in Mətbuat Xidmətinin Gəncə regional qrupundan YPX.AZ-a verilən məlumata görə, Tovuz Rayon Polis Şöbəsinin əməkdaşlarının keçirdikləri əməliyyat tədbirləri nəticəsində narkotik vasitələrin qanunsuz dövriyyəsində şübhəli bilinən Eşqin Ələkbərov saxlanılaraq, şöbəyə gətirilib.

Onun üzərinə qanunvericiliklə müəyyən edilmiş qaydada baxış keçirilən zaman 0.283 qram çəkidə narkotik vasitə olan metamfetamin aşkar olunaraq götürülüb. E.Ələkbərov ifadəsində narkotik vasitəni tanışı Musa adlı şəxsdən aldığını bildirib. Aparılan araşdırmalarla həmin şəxsin Musa Nağıyev olması müəyyən edilib və o saxlanılıb.

Davam etdirilən əməliyyat-axtarış tədbirləri nəticəsində saxlanılan şəxslərin ötən ilin iyul ayından bu günə qədər Tovuz və Şəmkir rayonlarında altı oğurluq hadisəsi törətdikləri də məlum olub.

Faktla bağlı araşdırmalar davam etdirilir.