Masallıda ağır qəza: sürücü öldü

Masallıda baş verən yol-nəqliyyat hadisəsi ölümlə nəticələnib.

APA TV-nin cənub bürosunun məlumatına görə, qəza rayonun Təzə Alvadı kəndində qeydə alınıb.



Kənd sakini - 1988-ci il təvəllüdlü Elmar Orucəli oğlu Səfərovun idarə etdiyi 90-EN-281 dövlət qeydiyyat nömrə nişanlı "Cherry" markalı avtomobil yol kənarındakı ağaca çırpılıb.



Ağır xəsarət alan sürücü huşsuz halda Masallı Mərkəzi Rayon Xəstəxanasına çatdırılıb: “Yaralı təxminən saat 23:00 radələrində ağır, huşsuz vəziyyətdə - qapalı kəllə-beyin travması, baş beyinin əzilməsi və beyin əsasının sınığı diaqnozu ilə daxil olub. Aparılan reanimasyon tədbirlərə baxmayaraq ertəsi gün keçinib”.

Faktla bağlı araşdırma aparılır.