Qoyuna görə adam öldürdülər

Ağcabədi rayonunda gənc oğlan dayısı ilə birgə fermeri öldürüb.

Yanvarın 20-də rayonun Hindarx qəsəbə sakini, 50 yaşlı İltifat Cənnətov polisə müraciət edərək qardaşı, 63 ya.lı Əhliman Cənnətovun saat 04 radələrində özünə məxsus fermadan 15 baş qoyunla birlikdə getdiyini və geri qayıtmadığını bildirib.

Əhliman Cənnətovun Hindarx qəsəbəsi ərazisində yerləşən fermasına, yaşayış üçün nəzərdə tutulmuş 1 otaqdan ibarət tikiliyə və tövləyə baxış keçirilib.

Bu zaman hər hansı cinayət izi aşkar olunmayıb.

Ağcabədi rayon Polis Şöbəsində Cinayət Məcəlləsinin adam oğurluğu və oğurluq maddələri ilə cinayət işi başlanılıb.

Yanvarın 22-də cinayət işi məcəllənin tamah məqsədi ilə adam öldürmə maddəsinə tövsif olunub.

İstintaq zamanı müəyyən edilib ki, rayonun Şərəfxanlı kənd sakini, 31 yaşlı Mamedzadə Sərxan Saleh oğlu dayısı, 39 yaşlı Mansur Qasımovla birlikdə qabaqcadan Ə.Cənnətovu öldürərək heyvanları ələ keçirməyi planlaşdırıblar.

Yanvarın 19-u axşam saat 20 radələrində M.Qasımova məxsus avtomobillə Ə.Cənnətovun fermasına gəliblər.

Əhliman onlara yaxınlaşaraq salamlaşıb, bu zaman Mansur onu ağac parçası ilə vurub yerə yıxıb, daha sonra huşsuz vəziyyətdə olan kişini özü ilə gətirdiyi iplə boğaraq öldürüb.

Ə.Cənnətovun meyitini maşının baqajına qoyaraq fermadan 150 metr kənarda əkin sahəsində basdırıblar.

Daha sonra fermadakı 14 baş qoyunu götürüb Ağcabədi mal-qara bazarına aparıb satıblar, əldə etdikləri pulu aralarında bölüblər.