Azərbaycanda dəhşətli hadisə: iki nəfər öldü

Şəkidə bir ailənin dörd üzvü yol qəzasına düşüb, ikisi ölüb, daha ikisi isə xəsarət alıb.

APA TV-nin yerli bürosunun xəbərinə görə, hadisə Qaraməryəm-İsmayıllı-Şəki avtomobil yolunun Şəki rayonunun Kövər Zəyzid kəndi ərazisindən keçən hissəsində qeydə alınıb. Bakı şəhəri Nəsimi rayon sakini, 1987-ci il təvəllüdlü Emin Rəsulzadənin idarə etdiyi "KİA SPORTAGE" markalı avtomobil yoldan çıxaraq aşıb.

Nəticədə avtomobildə sərnişin qismində olan sürücünün həyat yoldaşı, 1982-ci il təvəllüdlü Səbinə Rəsulzadə və övladı 2019-cu il təvəllüdlü Eldaq Rəsulzadə hadisə yerində ölüb. Sürücü Emin Rəsulzadə və övladı 2013-cü il təvəllüdlü Nəzrin Rəsulzadə xəsarət alaraq Şəki Rayon Mərkəzi Xəstəxanasına yerləşdiriliblər.

Faktla bağlı araşdırma aparılır.