Goranboyda yol nəqliyyat hadisəsi baş verib.
APA TV-nin yerli bürosunun məlumatına görə, hadisə rayonun Borsunlu kəndinin yaxınlığında qeydə alınıb.
Bərdə rayon sakini, 1948-ci il təvəllüdlü Əli Əliş oğlu Əhmədov idarə etdiyi “Mercedes Vito” markalı mikroavtobusla Bakı istiqamətində olarkən Şəmkir rayon sakini, 1989-cu il təvəllüdlü Elçin Nizami oğlu Əhmədovun idarə etdiyi qoşqulu “KamAZ”a arxadan çırpılıb.
Qəza nəticəsində mikroavtobusda olan 4 sərnişin müxtəlif bədən xəsarətləri ilə xəstəxanaya yerləşdirilib. Xəsarət alanlar 1993-cü il təvəllüdlü Rəşad Afiq oğlu Cəfərov, 1984-cü il təvəllüdlü, Türkmənistan vətəndaşı Qayğısız Amangəldiyevic Ağayev və daha iki nəfər ambulator müayinə alaraq evə buraxılıb.
Qeyd edək ki, “Mercedes Vito”da qəza zamanı 7 sərnişin olub.
Faktla bağlı araşdırma aparılır.