"Nəsimi ili" çərçivəsində Türkiyədə İmadəddin Nəsimi yaradıcılığına həsr olunmuş silsilə tədbirlər keçirilib. Baş tutan tədbirlərdə mədəniyyət naziri Əbülfəz Qarayev də iştirak edib.
Əvvəlcə paytaxt Ankarada Mədəniyyət Nazirliyi, Azərbaycan Milli Kitabxanası və Beynəlxalq Türk Mədəniyyəti Təşkilatının birgə təşkilatçılığı ilə "Nəsimi ili"nin təntənəli açılışı baş tutub.Tədbirdə Azərbaycanın mədəniyyət naziri Əbülfəs Qarayev, Türkiyə Prezidentinin Baş müşaviri Yalçın Topçu, Türkiyənin mədəniyyət və turizm nazirinin müavini Əhməd Haluk və TÜRKSOY-un baş katibi Düsen Kaseinov iştirak ediblər.
Əvvəlcə qonaqlar Nəsiminin həyat və fəaliyyətinin qələmə alındığı kitablarla tanış olublar. Tədbirdə çıxış edən TÜRKSOY-un baş katibi Düsen Kaseinov bildirib ki, böyük şairin anadan olmasının 650 illiyinin Azərbaycan dövlətinin qərarı ilə bütün türk dünyasında qeyd olunması onun yaradıcılığına verilən ən böyük dəyərdir. Çıxışlarda, həmçinin İmadəddin Nəsiminin zəngin elmi biliyə sahib olması, onun yaradıcılığındakı nadir üslubun hər zaman poeziya sevərlər tərəfindən cəlbedici qarşılanması, şeir və qəzəllərinin sevilə-sevilə oxunması, böyük tədqiqatçıların Nəsimi fəlsəfəsinə göstərdikləri maraqdan bəhs olunub.Sonra böyük şairin həyat və yaradıcılığını əks etdirən film nümayiş olunub.
Silsilətə tədbirlər İstanbulda Türk Ədəbiyyat Vəqfində davam etdirilib.Tədbirdə çıxış edən Azərbaycanın mədəniyyət naziri Əbülfəs Qarayev isə bildirib ki,İmadəddin Nəsimi yaradıcılığının dünyada tanınması, adının əbədiləşdirilməsi, əsərlərinin araşdırılması və kütləvi şəkildə nəşr edilməsi ulu öndər Heydər Əliyev xidmətləri ilə mümkün olub. Bu siyasətin Prezident İlham Əliyev tərəfindən uğurla davametdirildiyini deyən nazir söyləyib ki, Azərbaycanda görkəmli şəxsiyyətlərin tanıdılması istiqamətində mühüm addımlar atılır.
TÜRKSOY-un baş katibinin müavini, Fırat Purtaş isə çıxışında Nəsimi yaradıcılığının nəinki türk dünyasında, ümumiyyətlə, bəşəriyyət üçün dərin məna kəsb etdiyini deyib.
Tədbir Nəsimi yaradıcılığının fəlsəfəsinə həsr olunmuş panel iclası ilə davam edib.Daha sonra İmadəddin Nəsiminin qəzəllərindən ibarət konsert proqramı muğam üçlüyünün ifasında təqdim olunub.
