Azərbaycana qarşı 70 il davam edən Sovet təcavüzü 1990-cı ilin 20 yanvar tarixində dəhşətli faciə ilə nəticələndi. 29 il öncə törədilən qətliam tariximizin xronologiyasına ən ağır cinayətlərdən biri kimi həkk olundu.
Milli azadlıq və ərazi bütövlüyü uğrunda minlərlə insan həmin gün mübarizəyə qalxdı. Nəticədə 137 günahsız insan amansızlıqla qətlə yetirildi, yüzlərlə insan yaralandı. Bakı bir anda qan gölünə döndü...
Qanlı Yanvar gecənin şahidlərindən biri Laçın Əliyevadır. Təcili tibbi yardım həkimi kimi təyinatla 3 saylı Təcili Tibbi Yardım Stansiyasına göndərilən müsahibimiz yaralıları xilas edərkən 29 yaşı var idi.
Hazırda həmin stansiyanın böyük həkimi işləyən Laçın Əliyeva ilə söhbət əsnasında yaşananların dəhşətini onun gözlərindən anlamaq olardı. Yanvarın 19-u axşam 10 radələrində çağırışa gedən həkim briqadası yanvarın 20-si səhər saatlarında stansiyaya qayıdır.
