"Bunu demək üçün düşmən olmalısan" - Fazil Mustafa"Dövlət döyüşən yerdə hamı ona, orduya dəstək çıxmalıdır”. "Space” kanalında yayımlanan "Sadə həqiqətlər” verilişində qonaq olarkən deyib. O bildirib ki, erməni hücum edən kimi informasiya məkanında da hücum başlayır: "Sanki proses bir mərkəzdən idarə olunur. Erməni hücum edib, hər kəs dövlətlə bir yerdə istər xaricdə, istərsə, sosial şəbəkələrdə hücumun qarşısında durmalıdır. Amma hamı körpüdə deşik axtarmağa başlayır. Ordumuzda bu var, filan şeyi səhv etdik, başqa biri deyir ki, hücumu Xankəndinə, Şuşaya keçirmək lazımdır. Hər kəs öz mülahizəsini ortaya atır. Halbuki belə situasiyada hər kəs orduya necə dəstək olacağı ilə bağlı düşünməlidir. Burada da çox zaman üst-üstə düşən tezislər ondan ibarətdir ki, xaricdə də bir çox hallarda bu qüvvələrin arxasında həmən ölkələrə təsir imkanları geniş olan erməni şəbəkəsi müəyyən dərəcədə ilham verir. Xaricdə oturmusan və hərbçisən, tövsiyələrini yaz. De ki, filan istiqamətdə, filan addımlar atılsa, daha yaxşı olar. Qoy səni eşitməsinlər, amma sən cəmiyyət qarşısında de ki, mən gücüm çatanı etdim”. Deputat sabiq Müdafiə naziri Rəhim Qazıyevin insanları küçələrə səsləməsi ilə bağlı məsələyə münasibət bildirib: "Keçmiş Müdafiə naziri media vasitəsilə çıxıb insanları küçələrə səsləyir. Sən elə bacarıqlıydınsa, torpaqların itirilməsinə imkan verməzdin. Rəhim Qazıyev sosial şəbəkədə insanları küçələrə səsləyərək, müəyyən mənada da tezis verir ki, o torpaqları hakimiyyət verib. Bunu hansı düşmən olmayan adam deyə bilər? Bunu demək üçün düşmən olmalısan. Ümumiyyətlə, belə bir fikri cəmiyyətə söyləməkdən böyük cinayət yoxdur. Bunların hamısı cəbhədə olmuş adamlardır. Heç cəbhədə dediklərini tətbiq etməyiblər. İndi bu adamlar 20-25 ildən sonra deyir ki, Xankəndini belə vursan, Şuşanı elə vursan yaxşıdır. Sən əgər bu fikirlərində səmimisənsə, Müdafiə Nazirliyinə təkliflərini göndər. Azərbaycan dövləti güclüdür və belə şeylərlə ona zərbə vurmaq mümkün deyil. Uzaqbaşı ermənilərə epizodik sevinc yaşadacaqsınız. Bu günlərdə bir şeyi unutmamalıyıq ki, döyüş xəttində könüllü birliklər döyüşmür. Orada dövlət döyüşür, erməninin qarşısında dövlətin şəxsiyyəti durub. Dövlət döyüşən yerdə hamı ona, orduya dəstək çıxmalıdır”.
