"Matç tv" Bakının AVRO-2020-yə hazırlığından süjet hazırladı

  • 01.06.2020
  • 31 baxış
  • 0

Rusiyanın "Matç TV" kanalı AVRO-2020 ilə bağlı hazırladığı proqramda Bakı Olimpiya Stadionunda turnirlə bağlı hazırlıq barədə süjet çəkib. Offsideplus.az xəbər verir ki, AFFA-nın icraçı vitse-prezidenti Elxan Məmmədov AVRO-2020-yə hazırlıq barədə danışarkən martda çempionat üçün planlaşdırma mərhələsini başa vuraraq, həyata keçirmə mərhələsinə daxil olduqlarını bildirib. Məmmədov həmin anda UEFA-nın yarışı təxirə saldığını xatırladıb: "Avropa çempionatının 2020-ci ildə baş tutmayacağı martda bəlli oldu. Hazırlıq plana uyğun gedirdi və üç mərhələdən ibarət idi. Birinci planlaşdırma mərhələsidir. Mart ayından əvvəl baş verənlərin hamısı budur. İkinci mərhələ həyata keçirilməsi, üçüncü isə AVRO-2020-nin başlanğıcıdır. Bizim güclü tərəflərimizdən biri stadionun hazır olması idi. Əlavə sərmayəyə ehtiyac yoxdur və hər şey plan üzrə getdi. 2021-ci ilin iyununda stadionda böyük tədbirlər planlaşdırılmadı. Tədbirlərimizin çoxunu daxili qurğularda təşkil edəcəyik. Məqsəd bu gözəl ot örtüyünü qorumaqdır". İcraçı vitse-prezident Azərbaycan Premyer Liqasının yenidən başlaması barədə də danışıb: "Bütün klublar razılaşdı və müvafiq testləri həyata keçirdilər. Bu, hazırlıq mərhələsidir. Çempionatın bərpa olunmasına gəlincə, ilk növbədə, klubların məşqə başlamaları lazımdır. Bundan 3-4 həftə sonra isə çempionat bərpa olunmalıdır. Ancaq müəyyən risklərin olduğunu başa düşməliyik. Bu səbəbdən, Nazirlər Kabineti yanında Operativ Qərargahın tövsiyələrini dinləyir və yerinə yetiririk. Çünki hər hansı neqativ sonucların olmasını istəmirik. Təkcə AFFA yox, bütün strukturlar, fəaliyyət sahələri tövsiyələrə qulaq asmalı və sonra müvafiq qərarlar qəbul etməlidir". Bakı Olimpiya Stadionu A qrupunun İsveçrə - Uels, Türkiyə - Uels və Türkiyə - İsveçrə qarşılaşmalarına, eləcə də 1/4 final mərhələsinin 1 oyununa ev sahibliyi edəcək. AFFA Azərbaycan Premyer Liqasının bərpa tarixini ötən gün açıqlayıb. Qeyd edək ki, Avropa çempionatı 12 şəhərdə - Bakı, Sankt-Peterburq, London, Münhen, Roma, Buxarest, Dublin, Kopenhagen, Bilbao, Qlazqo, Budapeşt və Amsterdamda keçirilməlidir. Azərbaycan tərəfi UEFA-ya AVRO-2020-nin təşkil edəcəyinə dair dövlət təminatı verib.

Nə düşünürsən?